終於有時間靜落嚟，老土咁講，好似發咗一場夢。由第一套電影到今日，原來已經事隔10年，過往好多project總係擦身而過，多謝老友羅耀輝喺酒吧雪中送炭問一句：「要唔要試吓俾故仔Viu TV？」。 andylofai 上一次記招遇見魯生，親口向佢道謝，魯生反而好客氣咁向我哋團隊講多謝，仲同我講佢睇rough cut嘅時候已經幾鍾意，感謝魯生鼓勵及Viu TV提供左一個舞台俾我哋。 lofaig 特別想感謝另一位監製Debbie， 林淑賢，Debbie一直以來都好支持我哋想行嘅方向，亦都係第一個信任我哋堅持嘅人，仲記得佢話：「真係唔需要夾硬放感情線落去。」 台前幕後都俾盡200%努力，特別想感激飾演阿信嘅小龍 siulungling ，因為佢擔當起帶領觀眾體會《IT狗》世界嘅重任。記得當初差啲因為撞期而無法演出，佢又擔心過自己寂寂無名，冇辦法擔當一套劇集嘅主角。其實我哋成個班底都係寂寂無名，經驗都未夠，多謝佢信任，當佢應承咗出演，佢真係會完全地付出，感染每一位演員及工作人員。因為《IT狗》，我就多咗呢一班好朋友，希望我哋唔好咁快反面啦！😂 如果呢一個月嘅時間，《IT狗》可以帶俾大家少少嘅歡樂，又有少少嘅安慰，對我哋來講已經係最大嘅滿足，希望有機會下一次再做好啲。呢一個月嘅時間，我自己最開心嘅係，無論社交媒體同論壇嘅觀眾，以至創科、設計、藝術界別嘅觀眾，都一齊參與《IT狗》，並且成為劇情嘅一部份。各式各樣嘅插畫，故事入邊嘅platform / app實體化，出色嘅媒體人為我哋撰寫文章等等…… 你哋嘅參與證明咗香港人係好有創意，香港係可以有創意工業，香港係可以有創科。 係時候又要去另一個創作，跳入另一個世界，多謝大家連日嚟嘅支持，有緣嘅話，希望再用作品同大家見面。 #IT狗 #ingeekwetrust 片1: 結局後開live 片段 片2: 第一次圍讀片段 片3: 考察start up 片段